يعزف ثلاث آلات بـ(يد واحدة).! الفنان عبد الفتاح بدوي: لما أجي داخل الحفلة الناس بفتكروني (شحاد).!

حوار: شيماء محمد على

هو شاب يحب الغناء والعزف كثيراً برغم إعاقته، فهو يعزف على ثلاثة
او أربعة إيقاعات موسيقى أجادها بدقة كبيرة لفتت اليه الأنظار، وبالرغم
كل المعاناة أصر ان يحقق حلمه بان يكون رقما في خارطة الغناء السودانية
فحباه الله بصوت عذب ومهارة فائقة في العزف تفوق أقارنه من بين جيله
وأكبر سند له هو محبة أسرته وأصدقائه التي ظهرت كطاقة ايجابية دفعته
في مسيرته الفنية.

*عرفنا بك؟
-عبد الفتاح بدوي حامد الحاج اسكن الثورة الحارة 24
*المراحل التعليمية التي مررت بها ؟
– درست الابتدائي ثم الثانوي وتوقفت فقط ولم أكمل إلى الجامعة.
*ماذا كنت تتمنى أن تدرس تخصص ؟
-والله أنا كنت حابي اقرأ صيدلة او مختبرات طبية.
*كيف كانت طفولتك ؟
-نشأت في بيت فني ومنذ طفولتي بدأت علاقتي بالفن والموسيقى لأنو أخوي
معتز كان عازف أورغن وكان زمن (الشرائط وزمن المسجل) كان بجيب
الأغاني في المسجل وبعزف وأنا كنت بسمع اخوي بعمل في شنو وكانت
عندي رغبة أني أتعلم الحاجة دي، وابوي لمن شافني متعلق بالموسيقى قام
جابي لي بيانو هدية (حق لأطفال داك) قال لي اتسلى بيهو.
*كيف هي علاقتك مع إخوتك في البيت؟
-علاقة طيبة جدا، وهم السبب الأساسي في ما وصلت له دا لأنهم كانوا
يشجعونني، وناس بيتنا كلهم أصواتهم جميلة يعني (الماشي بغني والجاي
بغني) وكانوا ما بحسسوني اني معاق أو اي حاجة بل هم السبب في انهم
يخلوني أتعامل مع إعاقتي عادي والحمد لله اني ربنا حباني بأسرة مرحة وجميلة ومتفهمة حالتي.
*لمن تسمع من الفنانين؟
-والله من الجيل السابق بسمع للفنان الكبير وردي والفنان زيدان إبراهيم
والفنان ابو عركي البخيت ومن الفنانين الشباب بحب طه سليمان واحمد
الصادق.
*من الذي دعمك في مسيرتك الغنائية؟
-أولا الدعم بدأ من الأسرة أمي وإخواني ربنا يديهم العافية ومن اخوي معتز
بدوي الذي كان يوجهني، وايضا خالي الأستاذ محمد صالح محمد خير فتح
لي المجال لأنو كان شغال في قصر الشباب والأطفال ومن هنا انضممت
لدراسة الموسيقى وهنا تعرفت على الكثير من العازفين والموسيقيين منهم
الأستاذ/ صديق إبراهيم موسيقي بقصر الشباب والأطفال والأستاذ/ بجامعة
السودان قسم الموسيقى والدراما ولا انسى الأستاذ غدير ميرغني الذي أكن
له كل الحب والتقدير.
*أنت الآن تغني وتعزف رسمياً في الحفلات…كم عدادك؟
-انا ما بتوقف في الأسعار ومجامل بقدر الإمكان ، الجيران والأهل ما بتوقف معاهم في سعر. والله أنا البجيني والماعندو بشتغل ليهو وما بنعصر على الناس عارفين الظروف ما عندي اي مشكلة المهم الناس تفرح.
*هل شاركت في مهرجات من قبل ؟
-نعم شاركت في مهرجان إبداع الشباب للعام 2016 ، والحمد الله شلت
الكأس وكانت مشاركة جميلة جدا
والتقيت بفرقة دعاش التي شاركت في المسرح وبعد ذلك انضممت لفرقة
دعاش وشكلنا كورالا شاركنا به باسم محلية كرري وأنا شاركت بأغاني
وطنية.
* بتعزف كم آلة؟
-بعزف طبلة وإيقاع وأورغن وبحاول اتعلم الجيتار.
*في أي من الآلات وجدت صعوبة ؟
-الجيتار بحتاج مجهود ومسكة معينة بس مصر انو أتعلموا إن شاء الله.
*هل لديك أعمال خاصة بك ؟
-نعم كثيرة منها ( أحلى من الناس ) ( أحلى منك) ( يامهجة ) بعضها
كلمات اخوي الشاعر مرتضى بدوي من ألحان شخصي الضعيف.
*ما طموحك في هذه الحياة ؟
– أن أكون عندي اسم في المجال الغنائي زي الأجيال السابقة وإن شاء الله أبدع
فيهو وأقدم حاجات تليق بأذن المستمع السوداني، وأيضا نشر الثقافة
السودانية بالأخص الغناء الشعبي والحديث بمختلف الإيقاعات السودانية
لكل العالم.
*حدثنا عن مواقف طريفة صادفتك وأنت داخل الوسط الفني.؟
 
-كثيرة جدا جدا منها مؤلم ومنها مضحك فمثلا بكون شغال حفلة والفرقة
بتبدأ تعزف وأنا بجي طالع المسرح الناس بتعاين لي الناس بتقول دا
ماشي وين (دا ما بخرب الحفلة سااي ) (ودا شنو الجايبنو دا ) يعني وبعاني جداً حتى يفهموا اني أنا الفنان ما بصدقوا لكن أول ما اغني أي زول بسكت…في بعض الناس بفتكروني شحاد وفي بعض الناس بتقول لي: (حادث يا زول ولا خلقت الله ) وهكذا المواقف كتيرة.
*هل أنت راضٍ عن نفسك؟
-نعم الحمد لله راضي كل الرضى حققت حلمي باني أكون فنان ودي حاجة
بحبها، اما عن الإعاقة فهذا قضاء الله وقدرة وانا بشوف ربنا أكرمني
بحاجات كتيرة اولاً حب الناس ودي نعمة كبيرة وحققت حلمي وعمر
الاعاقة ما حرمتني من تحقيق حلمي وانا راضي تمام الرضى عما كتبه الله
لي.