Bank of Khartoum Visa Card

ماشرط تكون (ألماني).!

الشربكا يحلها || أحمد دندش

 

*الشكلة مدورة في الاستوب.
*العجاجة قايمة.
*وأب قميص مخطط شغال يكورك بأعلى صوتو.
*البوليس كبس.
*لقوا أب قميص مخطط شغال يكورك ويزحزح بي يدينو في الناس.
*طوالي كلبشوهو.
*ساقوهو النقطة.
*المتحري سألو يازول مالك عامل مشاكل.
*أب قميص مخطط عاين ليهو مخلوع وقال ليهو: (أنا مابتاع المشكلة ياجنابو…أنا حجاز ساكت).
*وكذلك علي الحاج-طيب الله إقامته في كوبر_.
*برضو وقف قدام القاضي ونكر (الشكلة) وطلع (ألماني) ساكت.
*بالغت يا(حجوج).
*طيب كدي (النسعلك)
*عماراتك الفي الفردوس وغيرو لما جيت تبنيها كتبت في التصاديق إنك (ألماني).؟
*دي خليها.
*طيب استثماراتك وقروشك لما جيت تلمها كتبت في الورق الرسمي بتاع المعاملات إنك (ألماني).
*دا كلو خليهو.
*طيب انت علاقاتك كيف مع العربات.؟
*كويسة صاح.
*طيب انت عارف انو (الحديد الألماني) ذاتو مامعترفين بيهو في السودان.
*مع انو حديد مافيهو كلام.
*لكن هنا ماعندو (سوق).
*عشان كدا اهدأ وروق و….
*(خليها مستورة).

شربكة:
*بالثقة القال بيها علي الحاج إنو ألماني ما بعيد تكون (ميركل) حالياً حايمة في سوق ليبيا بتشتري ليها في (تياب) عشان تحضر عرس ود صاحبتها (كلتوم).

شربكة ونص:
ياعلي الحاج…معقولة ٣٠ سنة شابكنا (خلوها مستورة) ولما يجي وقت (الكشف) تطلع لينا (ألماني).؟
شربكة ونص وخمسة:
بكرة تطلع لينا مروة الدولية وهي بتمغرز في عشة الجبلية وتغني ليها: (هيييي يالماعارفاني إسبانية….وفرحانة ليك بي عربية).

Leave A Reply

Your email address will not be published.